چیئرمین پیپلزپارٹی بلاول بھٹو نے تعلیم کے عالمی دن کے موقع پر اپنے پیغام میں کہا ہے کہ پاکستان میں تعلیم کے فروغ کے لئے پیپلزپارٹی نے سب سے زیادہ کام کیا اور ملک میں بہت زیادہ تعلیمی ادارے تعمیر کروائے.
انہوں نے کہا کہ ہر دور حکومت میں تعلیم کا فروغ پیپلز پارٹی کی اولین ترجیح رہی ہے ۔ بلاول بھٹو نے مزید کہا کہ پیپلزپارٹی کو یقین ہے کہ پاکستان کے بچوں اور نوجوانوں کا آنے والا مستقبل بہت روشن اور تابناک ہے اور تعلیم کے بغیر بچوں اور نوجوانوں کا یہ روشن مستقبل شرمندہ تعبیر رہے گا ۔
انہوں نے کہا کہ پیپلز پارٹی کے ہر دور حکومت میں تعلیمی بجٹ میں خاطر خواہ اضافہ کیا گیا ،بہت بڑی تعداد میں یونیورسٹیز اور دیگر ٹیکنیکل اور وکیشنل تعلیم کے ادارے قائم کیے گئے.
ان کا کہنا تھا کہ پیشہ ورانہ ٹیکنیکل تعلیم ہی نوجوانوں کے بہتر مستقبل کی ضمانت ہے تاکہ نوجوان ٹیکنیکل تعلیم حاصل کرکے برسرے روزگار ہو سکیں۔ اس مقصد کو حاصل کرنے کے لئیے تعلیمی بجٹ میں خاطر خواہ اضافہ کرنا ہوگا ۔
انہوں نے موجودہ حکومت پر تنقید کرتے ہوئے کہا کہ حکومت کا تعلیمی بجٹ کو جی ڈی پی کا 1.5 فیصد تک کم کرنا افسوسناک اور قابل مذمت عمل ہے.
آئندہ عام انتخابات میں اگر پیپلزپارٹی کی حکومت اقتدار میں آئی تو وہ تعلیمی بجٹ میں نمایاں اضافہ کرے گی ۔
انہوں نے اپنے بیان میں کہا کہ تعلیمی اداروں کے بجٹ میں کٹو تی پاکستان اور نوجوانوں کے مستقبل کونقصان پہنچانے کے مترادف ہے ۔ہمیں روایتی تدریسی طریقہ کار اور روایتی نصاب بھی تبدیل کرنا ہوگا ۔
انہوں نے مزید کہا کہ ہمیں ایسے تعلیمی نظام کی ضرورت ہے جو کہ تخلیقی اور تنقیدی سوچ کو فروغ دے سکے ایسے تعلیمی نظام کی ضرورت ہے جو بچوں میں مسائل حل کرنے اور فیصلہ سازی کی صلاحیت کو بڑھانے میں مددگار ثابت ہو ۔
پیپلزپارٹی کی حکومت تعلیمی بجٹ میں 3 فیصد تک اضافہ کریں گی تاکہ پاکستان اور پاکستان کے نوجوانوں کا مستقبل روشن ہو ۔
Leave a Reply