کرن راؤ سے طلاق کی وجہ کیا تھی؟ عامر خان نے خاموشی توڑ دی

بالی ووڈ کے مشہور اداکار اور مسٹر پرفیکشنسٹ کے نام سے مشہور عامر خان نے گزشتہ برس اپنی دوسری اہلیہ کرن راؤ سے طلاق لے لی تھی۔ دونوں سیلبریٹیز نے ایک مشترکہ بیان میں اپنی شادی ختم کرنے کا اعلان کیا تھا۔

عامر خان اور کرن راؤ کی جانب سے اس اعلان کے بعد بھارتی میڈیا پر مختلف افواہیں گردش کرنے لگی تھیں۔ ان خبروں اور افواہوں کے مطابق عامر خان اور کرن راؤ کے درمیان طلاق کی وجہ عامر خان کا کسی اور اداکارہ کے ساتھ افیئر تھا۔

بعض خبروں میں عامر خان کا نام دنگل میں ان کے ساتھ کام کرنے والی اداکارہ فاطمہ ثناء شیخ کے ساتھ منسلک کیا جا رہا تھا۔ کہا جا رہا تھا کہ عامر خان اور فاطمہ فلم لال سنگھ چڈھا کی ریلیز کے بعد نکاح کریں گے۔

ان خبروں کے منظر عام پر آنے کے بعد عامر خان اور فاطمہ ثنا کی جانب سے کوئی رد عمل نہیں دیا گیا تھا۔
تاہم، اب میڈیا کو دیے گئے اپنے ایک انٹرویو میں عامر خان نے خاموشی توڑتے ہوئے اپنی طلاق کی اصل وجہ بتائی اور اس کے ساتھ ساتھ فاطمہ اور ان کے افیئر سے متعلق خبروں کی تردید بھی کی۔

عامر خان کا کہنا تھا کہ کرن راؤ اور وہ ایک خاندان کی طرح ہیں۔ تاہم، ان کی شادی شدہ زندگی میں کچھ مسائل تھے جن کی وجہ سے انہوں نے طلاق کا فیصلہ کیا۔ عامر خان کا مزید کہنا تھا کہ انکے کرن کے رشتے کو کوئی اور نہیں سمجھ سکتا۔ عامر خان کا مزید کہنا تھا کہ کرن کے ہوتے ہوئے بھی انکا کسی خاتون سے کوئی افیئر نہیں تھا اور نہ اب ہے۔

تاہم، عامر خان نے اعتراف کرتے ہوئے کہا کہ انہوں نے اپنی دونوں بیویوں کو معمولی سمجھا اور انہیں باقاعدہ وقت نہیں دے پائے۔ ان کے مطابق اس کی بڑی وجہ انکا کریئر تھا۔ انکا کہنا تھا کہ انہوں نے جب 18 سال کی عمر میں فلم انڈسٹری میں قدم رکھا تو ان پر اپنا کریئر بنانے کی دھن سوار تھی۔ جس کی وجہ سے وہ اپنی فیملی اور والدین کو وقت نہیں دے پائے۔ جس کا انہیں افسوس ہے۔

یاد رہے کہ عامر خان کی پہلی شادی رینا دتہ سے ہوئی تھی۔ جس میں سے ان کے دو بچے جنید خان اور آئرا خان ہیں۔ تاہم شادی کے 16 سال بعد 2002 میں ان کے درمیان طلاق ہوگئی تھی۔ جبکہ عامر خان نے فلمساز کرن راؤ سے شادی 28 دسمبر 2005 میں کی تھی۔ عامر کرن راؤ سے فلم لگان کی شوٹنگ کے دوران ملے تھے۔

Posted

March 14, 2022